Ambulanse og politi er på staden etter ei ulukke der personbil og lettmotorsykkel har kollidert ved krysset Wessels gate/Professor Hansteens gate. Det skal ha vore to på sykkelen og 3-4 i bilen. Alle er oppegåande, melder Vest politidistrikt.

Ved Hosteland kai i Masfjorden køyrde ein båt opp på eit berg i 17.30-tida. Båtføraren, ein mann i 50-åra, blir tatt med til Haukeland universitetssjukehus i luftambulanse, melder Vest politidistrikt klokka 18.52. Båten hadde ein tube på slep. Det var to i båten og ein person i tuben. Politiet melde først at ein involvert har fått skader i ansikt/kjeve, ein har smerter i ribbein, ein er uskadd. Alle tre er oppegåande. Utanom føraren var det ein mann i 30-åra og ein gut på 13. Alle naudetatar og luftambulanse er på staden. Det er anslått at båten hadde 20-30 knop då ulukka skjedde.

I 12-tida søndag vart det oppdaga bensinlekkasje i vågen på Kolbeinshamn i Austevoll. Lekkasjen vaks etterkvart, og brannvesenet la ut lenser og skum. Folk vart bedne om å halde seg unna, på grunn av både brannfare og fare for helsefarleg bensindamp. Ifølge vaktleiar Børre Brekkvassmo i 110 Vest kan opptil 9000 liter bensin ha runne ut. Bensinen kom truleg frå bensinpumpe for båtar tilknytta oppdrettsanlegg. I 15.30-tida melde brannvesenet at lekkasjen var minkande.

I 16-tida fekk politiet melding om ein bil som kolliderte på ulike stader i Nordahl Rolfsens vei i Bergen. Bilen hadde også rygga inn i en busk, truffe ei trapp og køyrd over eit blomsterbed, før ferda stansa i ein lyktestolpe i Hagerups vei. – Føraren er opplyst å framstå noko forvirra, melder Vest politidistrikt. Kvinne i 70-åra vart sett til av helsepersonell på staden. Ho skal ikkje vera skadd, men vart tatt med til Bergen legevakt i ambulanse. Alkometer viste over tillaten verdi. Politiet tok førarkortet og det blir tatt blodprøve. Politiet har funne materielle skader på nokre bilar i Nordahl Rolfsens vei som bilen truleg har kollidert i. Bergingsbil blir rekvirert.

Klokka 16.15 varsla MO Gyldenpris politiet om ein person som har tatt seg opp på eit tak. Vedkomande fremstår rusa, og derfor var meldaren uroa for at personen kunne falle ned. Politiet kom til staden og personen er klokka 16.40 nede frå taket. Rusa og uskadd, og i kontakt med ein patrulje, melder Vest politidistrikt. MO er Mottaks- og oppfølgingssenter for rusmiddelavhengige over 18 år.

Naudetatane har rykt ut til ei trafikkulukke mellom ein bil og ein motorsykkel på Viksdalsvegen i Sunnfjord. To personar er involverte, føraren av motorsykkelen og føraren av bilen. Ulukka framstår som alvorleg, og luftambulanse er på veg til staden.

Naudetatane har rykt ut til Bømoen på Voss etter melding om ein fallskjermhoppar som skal ha falle ukontrollert mot bakken. Opplysningane er førebels ikkje stadfesta, og situasjonen er uavklart. Ressursar er på veg til staden.

Hovudredningssentralen melder klokka 15.45. at redningshelikopteret no har henta ut dei to vaksne turgåarane som stod fast i terrenget ved Bjørnsteg i Ullensvang. Ingen av dei er skadde. Redningsaksjonen vart sett i gang og frivillige frå Røde Kors kalla ut litt før klokka 14. Det var ein mann og ei kvinne i 50-åra som ikkje kom seg vidare opp eller ned. Helikopteret var først på veg til området, men vart i ein periode omdirigert til eit anna viktig oppdrag. Klokka 14.55 returnerte helikopteret til området og henta dei to skårfaste ut.

Ein mann busett i Kinn kommune er ilagt besøksforbod mot to kvinner i ti månader, skriv Firdaposten. Forbodet gjeld fram til mars 2027 og er stadfesta av tingretten. Bakgrunnen er fleire valdshendingar, mellom anna ei melding om kroppskrenking som framleis er under etterforsking. Retten meiner det er ein reell risiko for at mannen kan utføre straffbare handlingar, forfølgje eller krenkje freden til den eine kvinna. Mannen har ikkje lov til å oppsøkje eller kontakte kvinnene, verken direkte, på telefon, gjennom meldingar eller via andre personar. Sjølv om mannen og den eine kvinna har eit felles barn, meiner retten at kontakt om samvær kan gå gjennom ein tredjeperson.

Det går føre seg ein redningsaksjon i Jotunheimen etter at ein person fall under klatring søndag morgon. Personen var del av eit turfølgje på to. Ulukka framstår som alvorleg, og både redningshelikopter, luftambulanse og Norske Alpine Redningsgrupper er involverte i aksjonen.

Ein ung gut er frakta til sjukehus etter eit slagsmål i Sæbøvik i Kvinnherad natt til søndag. Politiet fekk melding om hendinga i Sæbøvikvegen klokka 02.07. Den mistenkte hadde forlate staden før politiet kom fram. Guten var medviten og kunne snakke, men skadeomfanget er førebels ukjent.

Den undersjøiske Bjorøytunnelen i Bergen vart klokka 18.35 stengd etter melding om at ein mann som gjekk i tunnelen. Mannen i 20-åra skal sjølv ha ringt inn til politiet. Politiet har no kontroll på mannen og tunnelen er opna igjen.

Ein bilførar svinga for brått av i eit vegkryss ved Kjerrgardsvika på Askøy og tippa over på den eine sida. Uhellet skal ha skjedd med låg fart. Mannen i 80-åra var åleine og melde sjølv frå. Han er ute av bilen og skal ikkje vere skadd. Naudetatane er på staden. Bilen ligg på sida, midt i vegen. Bilbergar er bestilt. Det er ingen lekkasjar frå el-bilen.

468 husstandar vart klokka 16.30 laurdag ettermidag råka av straumbrot på Knappskog og Geitanger i Øygarden kommune, melder BKK. Klokka 18.30 var straumen tilbake. I tillegg mista sju husstandar straumen på Titlestad i Fana klokka 17.45. Også der er straumen tilbake, etter at montørar har fjerna tre som låg over linja.

Ein motorsyklist køyrde ut av vegen i ein venstresving i ei 80-sone på riksveg 5 i Florø litt før 15.50. Føraren har smerter i ryggen. Ambulanse og politi er framme. Ulukka skjedde like vest for avkøyring til Botnavegen.

I retning Herøysund vest for Uskedalen i Kvinnherad har ein bil køyrd av vegen i ei 80-sone og sperrar eit køyrefelt, melde Vest politidistrikt klokka 15.34. Naudetatar er på staden. Tjue minutt seinare melde dei at bilen hadde snurra rundt og treft eit hus langs vegen. Sjåføren var åleine i bilen og skal ikkje vera skadd, men blir køyrd til legevakta på Husnes i ambulanse. Det er manuell dirigering på staden og bergingsbil er bestilt. I 16.30-tida opplyser Vest politidistrikt at bilen trefte grunnmuren på eit hus på motsett side av vegen. Det er ikkje opplyst om store skader på huset, og heller ikkje mistanke om ruskøyring. Ifølge politiet var det glatt veg på staden, på grunn av regn. Onsdag knuste ein annan bil inn i gjennom ein husvegg i Herand i Ullensvang.

Det er meldt om branntilløp i ein båt som ligg til kai på Askrova i Kinn kommune, like utanfor Florø. Brannvesenet er på veg til staden, og ein ambulansebåt er klar til å rykke ut. Saka er pågåande.

Ein gut som var sakna i Haukedalsområdet i Sunnfjord laurdag ettermiddag, er komen til rette etter ein større leiteaksjon. Ifølgje Firda vart fleire ressursar sette inn i søket, mellom anna eit redningshelikopter. Politiet opplyste klokka 14.01 at guten var funnen. Operasjonsleiar Dan Erik Johannesen seier til Firda at politiet valde å kalle ut store ressursar på grunn av omstenda, mellom anna fordi det var ei elv i nærleiken.

Naudetatane rykte laurdag morgon ut til ein containerbrann på Grimo i Ullensvang. Det er meldt om mogleg spreiingsfare til eit hus. Politiet og brannvesenet er på veg til staden.